AZIMIO LA EU :TANZANIA NI MAMLAKA HURU HAIGIZWI NA MAMLAKA NYINGINE

Serikali ya Tanzania imekanusha vikali tuhuma zote zilizomo katika azimio lililopitishwa na Bunge la Umoja wa Ulaya (EU) mnamo Novemba 26, 2025, kuhusu hali ya haki za binadamu na matukio ya baada ya uchaguzi nchini, ikisisitiza kuwa azimio hilo halina chembe ya ukweli na limeegemea kwenye simulizi za upande mmoja.

Azimio hilo, ambalo lilikuja na wito kwa Kamisheni ya EU kusubirisha kwa muda utiaji saini wa makubaliano ya Programu ya Ushirikiano kwa Mwaka 2025 (AAP 2025) yenye thamani ya Euro milioni 156, limesababisha mjadala mkubwa.

Katika ufafanuzi wake, Serikali imeelezea masikitiko yake kwamba Bunge la EU, licha ya uhusiano mzuri wa miaka 50, halikutoa fursa kwa Tanzania kusikilizwa kabla au wakati wa majadiliano. Serikali imekumbusha Bunge la EU umuhimu wa kutoa nafasi ya kusikilizwa, ikisema ni takwa la asili ya haki (natural justice) na msingi wa ushirikiano uliojengwa katika mazungumzo na kusikilizana.

"Kila upande ni Mamlaka huru (sovereign entity) na hakuna upande wenye Mamlaka ya kuagiza upande mwingine nini cha kufanya," ilifafanua Serikali.

Ilikumbusha kuwa, masuala ya kimahusiano kati ya Tanzania na EU yanasimamiwa na Kamisheni ya Umoja wa Ulaya na sio Bunge, hivyo maazimio ya Bunge yanapaswa kufanyiwa maamuzi mengine na Kamisheni hiyo kabla ya kufikishwa kwa Tanzania.

Upotoshaji kuhusu fedha

Kuhusu suala la fedha, Serikali ilipuuza taarifa za upotoshaji kwenye mitandao ya kijamii zilizodai kuwa EU imefuta kabisa misaada yote. Imethibitisha kuwa kilichofanyika ni kusubirisha kwa muda (put on hold) utiaji saini wa Programu Mpya ya Ushirikiano kwa mwaka 2025, ili kutoa fursa ya mashauriano na Serikali.

Serikali imesema Programu zingine za EU zilizokwishasainiwa, zikiwemo zile za mwaka 2024 kurudi nyuma, zinaendelea na hazijahusishwa na uamuzi huo. Programu iliyosubirishwa, yenye thamani ya Euro milioni 156, ilitarajiwa kusainiwa mwezi huu wa Novemba ili mikataba ya Fedha (Joint Financial Agreement) isainiwe Februari 2026. Serikali inatumaini mazungumzo yatakamilika kabla ya Februari ili kuruhusu Programu kuanza kama ilivyopangwa. 

Kama una Taarifa, Habari, Tangazo n.k Wasiliana nasi kupitia shinyapress@gmail.com au +255 788 469 464