Tanzania imesisitiza dhamira yake ya kuimarisha uhusiano wa kidiplomasia na jumuiya ya kimataifa, huku ikiwaomba washirika wa maendeleo kuipa nafasi ya kukamilisha uchunguzi kuhusu matukio yaliyojiri wakati wa Uchaguzi Mkuu wa Oktoba 2025.
Hayo yalisemwa leo Ijumaa, Novemba 28, 2025, na Waziri wa Mambo ya Nje na Ushirikiano wa Afrika Mashariki, Balozi Mahmoud Thabit Kombo (Mb.), wakati akikutana na Jumuiya ya Wanadiplomasia (Diplomatic Corps) wanaowakilisha Mataifa na Taasisi za Kimataifa nchini. Mkutano huu ulikuwa wa kwanza kufanyika tangu kuundwa kwa Serikali mpya ya awamu ya sita, kipindi cha pili, kufuatia uchaguzi mkuu uliopita.
Katika kikao hicho, Balozi Kombo aliwahakikishia Mabalozi wote ushirikiano kamili wa Tanzania kwa nchi na mashirika wanayoyawakilisha. Kauli hii ilijibiwa na Mabalozi hao, ambao walithibitisha dhamira yao ya kuendelea kushirikiana na Tanzania, jambo ambalo Waziri alilitaja kuwa ni kielelezo cha ukomavu wa diplomasia na uhusiano imara uliopo kati ya Tanzania na washirika wake wa maendeleo.
Katika mkutano huo Serikali ilitoa taarifa rasmi kwa Wanadiplomasia kuhusu zoezi la uchaguzi kwa ujumla na matukio mengine yaliyojiri mnamo Oktoba 29, 2025.
Waziri Kombo alifafanua hatua zilizochukuliwa kufuatia vurugu zilizojitokeza, ikiwemo kurejesha haraka hali ya utulivu na maisha ya kawaida, ulinzi wa maisha na mali za wananchi, na kuhakikisha mwendelezo wa huduma za miundombinu ya umma na shughuli za kiuchumi unaendelea.
Aidha, alieleza kuhusu hatua ya Rais wa Jamhuri ya Muungano wa Tanzania kuunda Tume ya Uchunguzi yenye jukumu la kubaini chanzo cha matukio hayo na kutoa mapendekezo ya hatua stahiki za kuimarisha mifumo ili kuzuia matukio kama hayo yasijirudie.
Waziri alifafanua kuwa Tanzania imepitia katika kipindi kigumu ambacho hakijawahi kutokea katika historia yake. Licha ya changamoto hiyo, Serikali na Watanzania sasa wanaingia kwenye hatua ya kuliponya taifa na kudumisha umoja, undugu, na mshikamano ili kusonga mbele. Aliahidi kuwa tathmini ya kina na hatua muhimu zitachukuliwa, zikiwemo majadiliano, uwajibikaji, na uimarishaji wa taasisi.
Kuhusu taarifa zinazotolewa na wadau mbalimbali wa kimataifa kuhusu hali ya Tanzania, Balozi Kombo aliwaasa na kuwasihi kuipa Tanzania nafasi ya kukamilisha uchunguzi ulioanzishwa.
“Tunawaasa kuipa Tanzania nafasi ya kukamilisha uchunguzi iliouanzisha. Matamko mengi yanaweza kuwa sehemu ya kupotosha au kuharibu uchunguzi husika. Tunaheshimu uhuru, lakini tunazingatia uhuru wenye mipaka na uwajibikaji,” alisisitiza Waziri, akiongeza kuwa Tanzania itaendelea kuwa muumini wa ushirikiano wa pamoja kimataifa wenye kuleta tija, amani na maendeleo.
Akizungumzia maazimio ya Bunge la Umoja wa Ulaya, Waziri Kombo alibainisha kuwa Tanzania imeyafuatilia, na kwamba amemuelekeza Balozi wa Jamhuri ya Muungano wa Tanzania mjini Brussels kuendelea na mashauriano ya kidiplomasia na taasisi za Umoja wa Ulaya na wadau husika, ili kuimarisha ushirikiano na kuendeleza maslahi ya pamoja ya amani, utulivu, na ushirikiano.
Kama una Taarifa, Habari, Tangazo n.k Wasiliana nasi kupitia shinyapress@gmail.com au +255 788 469 464
