MADIWANI WAOMBA WAKULIMA KUSOGEZEWA MBOLEA KARIBU NA MAENEO YAO

Shinyanga Press Club November 16, 2022

Mkurugenzi wa halmashauri ya Ushetu Linno Mwageni akiwa na makamu mwenyekiti wa halmashauri hiyo kwenye kikao cha kawaida cha baraza la amdiwani wakisikiliza hoja.

Na Kareny Masasy,Ushetu

BAADHI ya madiwani wa halmashauri ya Ushetu wilayani Kahama mkoani Shinyanga wameomba wakulima kusogezewa mbolea ya ruzuku karibu na maeneo yao ili kuepuka gharama kubwa ya kusafiri kufuata mboleo hiyo kwa mawakala.

Wakiongea kwenye kikao cha kawaida cha baraza la madiwani hapo jana diwani viti maalum Felister Kabasa na diwani wa kata ya Mapamba Yohana Emanuel walitoa hoja hiyo.

“Mbolea ya ruzuku imekuja lakini wakulima wanapata changamoto ya kuifuata wanaiomba serikali kuliangalia hilo limeanza kuwakatisha tamaa wakulima”amesema diwani Kabasa.

Makamu mwenyekiti wa halmashauri hiyo Doa Limbu amesema changamoto ya umbali kufuata mbolea za ruzuku na ucheleweshaji wa mbegu za pamba ufanyiwe kazi kwani kilimo ni sasa na izingatiwe idadi.

Ofisa kilimo wa halmashauri hiyo Deus Kakulima amesema wameongea na mawakala wanaotoa mbolea hiyo nakukubaliana kusogea karibu kuwe na vituo sita.

Madiwani hao wamelalamikia pia kushindwa kufanyika shughuli za maendeleo katika robo mbili za mwaka kutokana na mfumo wa kuhamisha fedha kushindwa kufunguka.

Diwani kutoka kata ya Kisuke Joseph Bundala na diwani kutoka kata kinamapuka Samweli Sharifu walitoa hoja hiyo katika kikao Cha baraza la madiwani.

Makamu mwenyekiti wa halmashauri hiyo Doa Limbu amesema wamekuwa wakihitaji maendeleo lakini suala la mfumo limeonekana kukwamisha na liko nje ya uwezo wa halmashauri.

Mwekahazina wa halmashauri hiyo Prosper Mlacha amesema hakuna mfumo wa halmashauri ya Ushetu bali mfumo huo unatumika kwa nchi nzima na unasimamiwa na Tawala za mikoa na serikali za mitaa (Tamisemi) na umekuwa ukileta changamoto .