Kuimarisha ulinzi katika jamii kumeonekana kuwa hitaji la haraka na muhimu ili kurejesha kikamilifu shughuli za biashara na kuwajengea imani wafanyabiashara wadogo.
Mkazi wa Kimara mkoani Dar es salaam Benjamin alitoa wito wa wazi kwa mamlaka:
“Nadhani katika mamlaka husika waendelee kuimarisha ulinzi katika jamii zetu kwa sababu hii vurugu inapotokea, kuna baadhi kama sisi wafanyabiashara tunaopata hasara."
Kauli hii inajenga hoja kwamba utulivu wa kiusalama huathiri moja kwa moja uwezo wa wafanyabiashara kufanya kazi, hasa wale wanaotegemea kipato cha kila siku.
Gaspar Apolnary anasisitiza kuwa watu wengi, wakiwemo wafanyabiashara wadogo wadogo, wanategemea kufanya kazi ili maisha yao yaende, na anahimiza kuishi kwa amani. Matukio ya hivi karibuni yamedhihirisha jinsi vurugu inavyoweza kuvuruga mnyororo mzima wa uchumi na maisha ya jamii, huku Shaban Moshi Shaban akishuhudia jinsi hali ilivyokuwa mbaya mpaka vitu kama mafuta kupanda bei.
Kwa kurejea kwa hali ya kawaida, pongezi zimetolewa kwa Jeshi la Ulinzi kwa kazi nzuri. Ulinzi imara na endelevu ndio dhamana pekee ya kuwezesha wafanyabiashara kuamini na kuwekeza, hivyo kujenga uchumi imara.
Kama una Taarifa, Habari, Tangazo n.k Wasiliana nasi kupitia shinyapress@gmail.com au +255 788 469 464
