CHEREHANI USHETU IMEBADILIKA NICHAGUENI TENA NISIMAMIE MIRADI NA KUTATUA CHANGAMOTO ZOTE.

Na Kareny Masasy, Ushetu

MGOMBEA Ubunge kupitia chama cha Mapinduzi (CCM) jimbo la Ushetu Wilayani Kahama Mkoani Shinyanga Emanuel Cherehani amesema wananchi waendelee kumuamini na kumchagua ili aweze kukamilisha miradi iliyotengewa fedha na serikali ambayo inaendelea kutekelezwa na kuendelea kutatua changamoto zingine ikiwemo suala la kilimo.

Pia amesema Serikali imetoa shilingi Bilioni 156 kwa jimbo hilo kwaajili ya shughuli za Maendeleo ikiwemo ujenzi wa vyumba vya madarasa, miundombinu ya barabara na kuweka nishati ya Umeme ambavyo vyote amevipigania na fedha kupatikana.

Cherehani amesema hayo tarehe 13.Septemba,2025 kwenye uzinduzi wa Kampeni wa jimbo hilo uliofanyika kijiji cha Iramba kata ya Igwamanoni ambapo alieleza jimbo hilo lina kata 20,vijiji 122 na vitongoji 550 ikiwa aliingia madarakani mwaka 2021 mwezi Oktoba baada ya mbunge aliyekuwepo kufariki alikuta vijiji 70 tu ndiyo vina nishati ya Umeme.

Cherehani amesema serikali ilileta shilingi Bilioni 156 kwa nyakati tofauti kwaajili ya kutatua kero za wananchi kwani kuna mradi wa sola unaogharimu shilingi Bilioni 11.7 unaoendelea kujengwa kijiji cha Kayenze na wakandarasi bado wanaendelea na kazi na tayari kuna sola zaidi ya 200 zipo tayari.

"Mpaka sasa vijiji vyote 112 vina nishati ya umeme na baadhi ya vitongoji hivyo tupeni kura chama cha Mapinduzi wagombea wote wa Udiwani, Ubunge na Rais tutekeleze yale ambayo tumeanza nayo na kuyakamilisha na lengo la kuwa na mradi mkubwa wa Sola tunataka kila kitongoji kuwe na umeme kuongeza nguvu ya umeme uwe wa uhakika maeneo yote."amesema Cherehani.

Cherehani amesema zaidi ya shilingi Bilioni 9.2 zimeletwa na serikali jimboni hapo na kujenga vyumba vya madarasa 230 na shilingi Milion 540 zimejenga shule ya sekondari Mweri ya wasichana na hakuna mwananchi aliyechangishwa fedha zake na watoto wanasoma vizuri.

Cherehani amesema bado kuna changamoto ya miundombinu ya barabara kuwa mibovu ambapo jimbo hilo walipata shilingi Milioni 600 kwaajili kuweka Molamu baadhi ya barabara na endapo wananchi wakimpatia ridhaa ya kuongoza tena atahakikisha barabara za kuunganisha kutoka kijiji kimoja kwenda kingine zinaboreshwa zaidi na kupitika kirahisi.

Mgombea diwani wa kata ya Igwamanoni Gagi Lala amesema vijiji vyote saba vina nishati ya umeme,kuna zahanati mbili na kituo cha afya kimoja, lakini zahanati zingine zinajengwa mbili nakufikisha hospitali tano ndani ya kata moja , maji ya kisima kirefu ndiyo wanatumia ni kazi ya Chama Cha Mapinduzi ambayo imetekeleza ilani yake na itaendelea kutekeleza wakiichagua.

Mwenyekiti wa Chama Cha Mapinduzi (CCM) Mkoa wa Shinyanga Mabala Mlolwa amesema ilani ya chama imeeleza vizuri kila changamoto inakwenda kutekelezwa hivyo wachague chama hicho na wagombea wake kwani ilani itatekelezwa kwa kuwachagua wote wanaotokana na chama hicho na mambo makubwa yamefanyika yanaonekana ndani ya mkoa huu ikiwemo Ruzuku ya mbolea kwa wakulima.

Mkazi wa kata ya Nyamilangano Sawaka Sagenge amesema wanachotaka viongozi watakao chaguliwa mwaka huu wahakikishe changamoto zinaenda kutatuliwa kwani wanahitaji barabara yenye urefu wa kilomita 54 iwe ya lami inayotoka kwenye kata hiyo hadi mjini Kahama kwani ina kiwango cha changarawe ambayo ndiyo kiungo kikuu kwenye jimbo hili.

Mkazi wa Kitongoji cha kipangu kata Igwamanoni Gaudensia Mahushi amesema viongozi watakao wachagua wanaomba nishati ya umeme kwenye kitongoji hicho kwani umeme umeishia kwenye kijiji pekee na miundombinu ya barabara mibovu wakitaka kwenda kijiji jirani wanazunguka hakuna barabara kabisa hata wakiwa wanakwenda kwenye Zahanati ni changamoto.