MKUU WA MKOA WA SHINYANGA AFANYA ZIARA YA KIKAZI WILAYANI KISHAPU, ATOA MAAGIZO KWA WATUMISHI NA KUHIMIZA UKUSANYAJI WA MAPATO BILA SHURUTI
KISHAPU, Julai 22, 2025 — Mkuu wa Mkoa wa Shinyanga, Mhe. Mboni Mhita, ameendelea na ziara zake za kikazi katika wilaya za mkoa huo ambapo amefanya ziara wilayani Kishapu kwa lengo la kukagua miradi ya maendeleo pamoja na kuzungumza na watumishi wa Halmashauri ya Wilaya hiyo.
Katika ziara hiyo, Mhe. Mhita alitembelea miradi kadhaa inayotekelezwa kwa fedha za Serikali Kuu, mapato ya ndani na michango ya wadau, ikiwa ni sehemu ya tathmini ya utekelezaji wa shughuli za maendeleo sambamba na kujionea namna fedha za umma zinavyotumika. Miradi aliyotembelea ni pamoja na ujenzi wa shule, zahanati na barabara za vijijini.
Baada ya ukaguzi huo, Mhe. Mhita amezungumza na watumishi wa Halmashauri ya Kishapu ambapo aliwataka kufanya kazi kwa bidii, weledi na kwa uadilifu mkubwa. Alisisitiza kuwa mtumishi wa umma ni kioo cha Serikali kwa wananchi, hivyo ni wajibu wao kusikiliza na kushughulikia kero za wananchi kwa wakati badala ya kusubiri malalamiko yafike ngazi za juu.
“Hatutaki kusikia mwananchi anakaa miezi kadhaa bila kupatiwa huduma kwa sababu ya uzembe wa mtumishi. Kuweni sikivu, fanyeni kazi zenu kwa moyo wa kujituma na kwa kuzingatia sheria, taratibu na kanuni,” alisema Mhe. Mhita.
Vilevile, alitoa maagizo kwa Halmashauri hiyo kuhakikisha inaweka mikakati thabiti ya kuongeza mapato ya ndani kwa njia rafiki na bila kutumia nguvu kwa walipa kodi. Alisema ni muhimu kushirikiana na wafanyabiashara na wadau wengine ili kuongeza mapato yatakayosaidia utekelezaji wa miradi ya maendeleo bila kutegemea zaidi rasilimali kutoka Serikali Kuu.
“Tunataka mabadiliko yanayoonekana. Kishapu iwe mfano wa namna bora ya ukusanyaji wa mapato kwa njia rafiki na jumuishi. Huu ni mkoa wenye fursa nyingi, tuzitumie vizuri kwa maendeleo ya watu wetu,” aliongeza.
Mhe. Mhita pia ameahidi kuwa ofisi yake itaendelea kushirikiana na halmashauri zote za mkoa huo kuhakikisha utekelezaji wa miradi ya kimkakati na ile ya maendeleo inakamilika kwa wakati ili iweze kuwanufaisha wananchi ambao ndio walengwa.
