RC MHITA AIPONGEZA HALMASHAURI YA WILAYA YA SHINYANGA KUPATA HATI SAFI

Na Marco Maduhu, SHINYANGA

Mkuu wa mkoa wa Shinyanga Mboni Mhita, ameipongeza Halmashauri ya wilaya ya Shinyanga kwa kupata hati safi inayoridhisha, kutoka kwa Mdhibiti na Mkaguzi Mkuu wa Hesabu za Serikali (CAG), akibainisha kuwa hiyo ni ishara ya usimamizi mzuri wa fedha za umma.

Ametoa pongezi hizo leo Julai 9, 2026, alipokuwa akitoa salamu za mkoa kwenye kikao cha Baraza la Madiwani, kilichokuwa na ajenda ya kupokea na kujadili hoja za CAG kwa mwaka wa fedha 2024/2025.

Pamoja na pongezi hizo, Mhita ameitaka halmashauri hiyo kubuni vyanzo vipya vya mapato ya ndani, ili kupata fedha zitakazosaidia kutekeleza na kuibua miradi mbalimbali ya maendeleo kwa wananchi.

Amesema kuwa, Rais Dk. Samia Suluhu Hassan amekuwa akitoa fedha nyingi mkoani humo kwa ajili ya utekelezaji wa miradi, na kwamba kufuatia hatua hiyo, amezitaka halmashauri kuongeza ubunifu katika kukusanya mapato ili kuonyesha dhamira ya dhati ya kumuunga mkono Rais katika kuwaletea wananchi maendeleo.

Viongozi wengine wamwaga pongezi

Hatua hiyo ya kupata hati safi imeungwa mkono na viongozi mbalimbali wa wilaya hiyo:

Mbunge wa Jimbo la Itwangi, Azza Hillal Hamad naye Amepongeza halmashauri hiyo kwa kupata hati safi na kufanikiwa kujibu hoja za CAG.

Naye Mwenyekiti wa CCM Wilaya ya Shinyanga Edward Ngelela, ametoa pongezi zake kwa halmashauri hiyo kwa kupata hati safi.

Mnyambuliko wa hoja za CAG

Awali, Mwekahazina wa Halmashauri ya Wilaya ya Shinyanga Shimi Emmanuel, akisoma taarifa ya CAG, amesema kuwa halmashauri hiyo ilikuwa na jumla ya hoja 29.

Mchanganuo wa hoja hizo upo kama ifuatavyo:

Hali ya Hoja	Idadi
Hoja zilizofungwa kikamilifu	10
Hoja zilizopo katika hatua za utekelezaji	19
Jumla Kuu	29

Kwa upande wake, Mkaguzi na Mdhibiti Mkuu wa Hesabu za Serikali (CAG) Mkoa wa Shinyanga Yusuph Marwe, ametoa ushauri kwa menejimenti ya halmashauri hiyo, kwamba katika ufutaji wa hoja, miradi ya muda mrefu ipewe kipaumbele ili ikamilike, ihakikiwe na CAG na kisha kufungwa.

Mwenyekiti wa Halmashauri ya Wilaya ya Shinyanga Seth Msangwa, amesema maelekezo yote yaliyotolewa yatafanyiwa kazi kikamilifu, ikiwa ni pamoja na kuendelea kujibu hoja hizo za CAG.

TAZAMA PICHA👇👇

Mkuu wa Mkoa wa Shinyanga Mboni Mhita akizungumza.