Na Mwandishi Wetu - Rukwa
Katika hatua kubwa ya kuboresha sekta ya afya Mkoani Rukwa, kliniki ya matibabu bure imeanzishwa katika Manispaa ya Sumbawanga, ikileta matumaini kwa mamia ya wakazi waliofaidika na huduma hizo.
Kliniki hiyo ambayo ni matokeo ya ushirikiano kati ya serikali ya Tanzania na Ubalozi wa China, imelenga kuleta huduma za afya karibu na wananchi, ikiwa ni pamoja na kuwapunguzia Wananchi changamoto za gharama ambazo zimekuwa zikizorotesha huduma za matibabu.
Ikiwa katika Kituo cha Afya cha Mazwi, kliniki hiyo imekwisha piga hatua kubwa, ambapo watu zaidi ya 600 wamepata huduma mbalimbali, ikiwa ni pamoja na vipimo na matibabu ya ugonjwa wa kisukari, shinikizo la damu, magonjwa ya mifupa, matatizo ya upumuaji, vidonda vya tumbo, na matatizo ya meno, mbapo tangu ifunguliwe Machi 17, 2026. Huduma hizo zinatolewa bure, hatua ambayo imepokelewa vyema na Wananchi.
Akizungumza katika hafla ya uzinduzi, Mkuu wa Mkoa wa Rukwa, Charles Makongoro Nyerere, alisifu kliniki hiyo kama hatua kubwa kuelekea kuboresha huduma za afya Mkoani Rukwa. "Kliniki hii inatoa huduma za uchunguzi, ushauri, na matibabu bure, kama sehemu ya juhudi za kuboresha sekta ya afya chini ya uongozi wa Rais Samia Suluhu Hassan," alisema.
Mkuu wa Mkoa aliongezea: "Tunaazimia kuendelea kufanya kazi na washirika wetu kuhakikisha kuwa huduma za afya zinapatikana kwa wote."
Kliniki hiyo ni sehemu ya mpango mpana wa kuboresha huduma za afya nchini Tanzania, kwa kuzingatia huduma za kinga na utambuzi wa mapema wa magonjwa. Takwimu zinaonyesha kuongezeka kwa magonjwa yasiyo ya kuambukiza Mkoani Rukwa, hasa shinikizo la damu na ugonjwa wa sukari, jambo linaloonyesha haja ya uchunguzi wa mapema na matibabu.
Kliniki hiyo inasimamiwa na timu ya wataalamu wa matibabu wa Kitanzania na Kichina, ambao wanatoa huduma mbalimbali, ikiwa ni pamoja na upasuaji mdogo na ushauri wa lishe. Timu hiyo inafanya kazi kwa bidii kuhakikisha kuwa wagonjwa wanapata huduma wanazohitaji, huku wengi wao wakiwa wameridhishwa na huduma hizo.
"Nimegunduliwa kuwa na shinikizo la damu na kupewa dawa," alisema Asha, mmoja wa wanafaidika wa kliniki hiyo. "Ninamshukuru Mungu kwa huduma hizo. Ni faraja kubwa kujua kuwa ninaweza kupata matibabu bila kulazimika kusafiri umbali mrefu na kulipa gharama za matibabu."
Uzinduzi wa kliniki hiyo umeibua umuhimu wa elimu ya afya, huku wakazi wengi wakichukua fursa hiyo kujifunza zaidi kuhusu kuzuia magonjwa, lishe, na usafi. "Tunaazimia kuwawezesha jamii zetu kwa maarifa," alisema Nyerere. "Elimu ya afya ni sehemu muhimu ya mkakati wetu wa afya, na tunafanya kazi kuhakikisha kuwa kila mmoja anaweza kupata taarifa anazohitaji ili kubaki na afya njema."
