Katika hali inayoashiria dhamira ya dhati ya kuandaa Taifa la wasomi na wabunifu, Serikali ya Awamu ya Sita imepiga hatua kubwa ya kimkakati kuelekea utekelezaji wa Dira ya Taifa ya Maendeleo 2050.
Agizo hilo lililotolewa na Naibu Waziri wa TAMISEMI, Reuben Kwagilwa, akiwa katika Shule ya Sekondari ya Wasichana Longido Samia mkoani Arusha, si tukio la kawaida; ni sehemu ya mfululizo wa juhudi za Rais Samia Suluhu Hassan kuhakikisha kuwa sayansi na teknolojia vinakuwa uti wa mgongo wa elimu yetu.
Utekelezaji wa miradi hii mikubwa ya elimu unawezekana nchini Tanzania kutokana na misingi mikuu miwili:Uwepo wa amani na utulivu na sera safi za elimu na mabadiliko ya kimfumo.
Hakika amani iliyopo nchini ndiyo kigezo kikuu kinachotoa nafasi kwa Serikali kuelekeza mabilioni ya fedha kwenye miundombinu ya elimu badala ya migogoro. Mazingira tulivu yanaruhusu wanafunzi kujifunza kwa amani na wataalamu kama wale wa Chuo cha Serikali cha Hombolo kuingiza mifumo ya kidijitali bila hofu.
Aidha mabadiliko makubwa ya mitaala na mifumo ya ufundishaji iliyofanywa na serikali inaashiria haja ya kuipeleka Tanzania katika matumizi makubwa ya teknolojia za kisasa.
Matumizi ya mifumo ya mtandaoni (E-learning) yanakuja kutatua changamoto ya muda mrefu ya uhaba wa walimu wa sayansi, huku yakihakikisha mwanafunzi anapata maarifa bora hata bila mwalimu wa darasani.
Uwekezaji kwa Vijana na Nishati Safi
Sera hizi haziishii kwenye kompyuta pekee. Ufungaji wa miundombinu ya nishati safi ya kupikia katika shule hizi ni sehemu ya mkakati wa kulinda mazingira na kutengeneza mazingira tulivu ya kujifunzia. Hii ni sera inayomlenga mwanafunzi kwa ukamilifu—kutoka lishe bora, mazingira safi, hadi teknolojia ya kisasa.
Dhamira ya usawa imejidhihirisha pale Naibu Waziri Kwagilwa alipoagiza watoto wa pembezoni, ikiwemo Wilaya ya Longido, kupewa kipaumbele katika shule hizo za kisasa. Huu ni ujumbe kuwa Serikali haitaki kumuacha kijana yeyote nyuma, awe mtoto wa mfugaji au wa mjini, wote wanapata fursa ya kuifikia teknolojia.
Kwa kuunganisha juhudi za TARURA kwenye barabara, nishati safi, na mifumo ya TEHAMA, Serikali inatengeneza kizazi cha "Walinzi wa Dira ya 2050".
Hawa ni vijana watakaokuwa na uwezo wa kipekee kifikra na kiteknolojia, wakiwa wameandaliwa kuanzia ngazi ya awali na darasa la kwanza ambako mbegu ya kwanza ya utaalamu inapandwa.
Shule kama Longido Samia sasa zinakuwa vitovu vya mageuzi, zikionyesha kuwa Tanzania ya kidijitali inawezekana chini ya uongozi makini na sera zinazogusa maisha ya vijana moja kwa moja.
Kama una Taarifa, Habari, Tangazo n.k Wasiliana nasi kupitia shinyapress@gmail.com au +255 788 469 464
