HALI ya taharuki imetanda ndani ya Kanisa Katoliki nchini Tanzania baada ya kundi la waumini zaidi ya 100, wanaopambanuliwa kama wenye "msimamo wa wastani," kufika katika Ubalozi wa Vatican jijini Dar es Salaam kuwasilisha malalamiko mazito dhidi ya viongozi wao wa kiroho.
Waumini hao wamewasilisha barua rasmi ya kumlalamikia Askofu Mkuu wa Jimbo Kuu la Dar es Salaam, Yuda Thaddeus Ruwa’ichi, pamoja na Katibu Mkuu wa Baraza la Maaskofu Katoliki Tanzania (TEC), Padri Charles Kitima.
Siasa Nje, Amani Ndani
Mvutano huo unakuja kufuatia kile waumini hao wanachodai kuwa ni mfululizo wa matamko na mienendo ya kisiasa ya viongozi hao, ambayo inakwenda kinyume na mwelekeo mpya wa uongozi wa Baba Mtakatifu Leo XIV.
Inafahamika kuwa tangu kumalizika kwa mwaka huu wa 2025, Papa Leo XIV amekuwa akisisitiza kuwa Kanisa linapaswa kuwa "chemchemi ya amani na maridhiano" na kujiweka mbali na siasa za makundi zinazoweza kuwagawa waumini.
"Tumekuja hapa kuelezea masikitiko yetu. Papa Leo XIV anatuasa kuhubiri amani na kuacha siasa, lakini hapa nyumbani viongozi wetu Askofu mkuu Ruwa'ichi na Padri Kitima wanaonekana kuegemea upande wa siasa zaidi kuliko kulisha kondoo kiroho," alisema mmoja wa waumini walioongoza msafara huo.
Madai ya Barua Hiyo
Katika barua hiyo ambayo nakala yake imetumwa kwa Idara ya Mahusiano ya Kidiplomasia ya Vatican (Secretariat of State), waumini hao wameorodhesha malalamiko yafuatayo:
Matumizi ya Madhabahu: Kwamba baadhi ya mahubiri yamegeuka kuwa majukwaa ya kukosoa au kuunga mkono harakati za kisiasa badala ya injili.
Kuvunja Heshima: Lugha zinazotumiwa na viongozi hao zinadaiwa kuwavunjia heshima waumini wenye mitazamo tofauti.
Kupuuza Maelekezo ya Vatican: Kwamba msisitizo wa Papa Leo XIV kuhusu Kanisa kujikita kwenye amani unapuuzwa makusudi ili kufanikisha ajenda za kienyeji.
Msimamo wa Papa Leo XIV
Kauli ya Papa Leo XIV aliyoitoa hivi karibuni ikitaka Kanisa kuacha kujihusisha na siasa za moja kwa moja na badala yake kuwa kiunganishi cha jamii, imekuwa kama "silaha" kwa waumini hawa wa wastani. Wanadai kuwa msimamo wa Kanisa nchini Tanzania chini ya viongozi hao wawili unahatarisha umoja wa waumini ambao wana itikadi tofauti za kisiasa.
Majibu ya Ubalozi
Balozi wa Vatican (Nuncio) hapa nchini hajatoa tamko lolote kwa vyombo vya habari, lakini maafisa wa ubalozi wamethibitisha kupokea barua hiyo na kusema itafanyiwa kazi kulingana na taratibu za Kanisa na kidiplomasia.
