Wakati Watanzania wakijiandaa kusherehekea sikukuu ya Krismasi, sauti za onyo zimetawala kila kona ya nchi dhidi ya yeyote anayepanga kuvuruga utulivu uliopo.
Baada ya kuvuka salama maadhimisho ya Uhuru Desemba 9 licha ya hofu iliyojaribu kupandikizwa, Serikali na wananchi wametoa msimamo thabiti: "Kama walivyoshindwa kuvuruga Desemba 9, hawatafanikiwa Desemba 25."
Mkazi wa Dodoma, Joshua Mahenge, anabainisha kuwa nchi yenye amani ndiyo inayopata nafasi ya kutekeleza mipango ya maendeleo na kujenga jamii yenye usawa. Kwake yeye, amani ni uwezo wa Taifa kuhimili changamoto na kujenga kizazi chenye matumaini.
Kauli hii inaungwa mkono na Victoria Kavishe, anayewataka Watanzania kulinda amani kama nguzo inayowezesha watu kufanya kazi, kusafiri, na kujenga familia bila hofu.
Viongozi wa Serikali wamesisitiza kuwa vyombo vya dola viko macho kudhibiti viashiria vyote vya uvunjifu wa amani. Ujumbe ni mmoja—amani si jambo la hiari.
Witness Lema anawakumbusha wananchi kuwa ni muhimu kila mmoja kutambua wajibu wake wa kuzuia vurugu na ubaguzi, akisisitiza utamaduni wa mazungumzo na kuheshimiana kama silaha kuu ya kulinda Tanzania yetu na uchumi wake.
Uchumi wa nchi yoyote unayumba pale amani inapotikiswa. Huku Tanzania ikijikita katika miradi mikubwa ya maendeleo, wananchi wameapa kutoruhusu kikundi chochote kurudisha nyuma gurudumu la uchumi kwa kisingizio cha machafuko.
Swaumu Nyungulu anatoa ushuhuda wa hali ya hofu iliyojitokeza Oktoba 29, 2025, ambapo watu walishindwa kwenda kazini na shuleni. "Hatutaki hali hiyo irudie," anasisitiza, akibainisha kuwa amani ndiyo inayochangia ustawi wa kiuchumi.
Kwa upande wake, Clinton Gidion anaeleza kuwa amani ni kivutio kikubwa kwa wawekezaji wa ndani na nje. Anaonya kuwa pasipo utulivu, uzalishaji unakwama, jambo ambalo linaweza kuleta umaskini.
Hii inaendana na msisitizo wa Serikali kuwa usalama wa mwananchi na mali zake ndio kipaumbele namba moja kuelekea sikukuu ya Krismasi.
Amina Jamal anaongeza kuwa amani ikidumishwa, fursa huongezeka na Taifa hupiga hatua kwa kasi. Anatoa mwito kwa kila Mtanzania kuepuka uchochezi na migawanyiko, kwani kulinda amani ni wajibu wa sote kwa ajili ya vizazi vijavyo.
Kauli hizi zinaakisi msimamo wa viongozi wa kitaifa kuwa jaribio lolote la kuvuruga utulivu wa nchi katika sikukuu ya Desemba 25 litadhibitiwa kwa nguvu ya sheria.
Kama una Taarifa, Habari, Tangazo n.k Wasiliana nasi kupitia shinyapress@gmail.com au +255 788 469 464
