Katika hali ya kuondoa upotoshaji, Serikali ya Tanzania imefichua kuwa uamuzi wa Bunge la Umoja wa Ulaya (EU) kusubirisha utiaji saini wa fedha za Programu ya Ushirikiano ya Mwaka 2025 (AAP 2025), zenye Euro milioni 156, hauathiri Bajeti ya Serikali Kuu bali unakwenda kugonga mfumo mzima wa wadau wa maendeleo, ikiwemo sekta binafsi nchini.
Serikali imeeleza kuwa fedha hizo hazikutarajiwa kuingizwa kwenye Mfuko Mkuu wa Serikali (Budget Support) na wala hazitaathiri Bajeti Kuu ya Serikali. Badala yake, zaidi ya asilimia 89 ya fedha hizo zimepangwa kutekelezwa kupitia mfumo wa indirect management unaohusisha mashirika ya nchi wanachama wa EU, Taasisi za Kimataifa, Asasi za Kiraia (NGOs), na Sekta Binafsi ya Tanzania na Ulaya.
Zaidi ya Milioni 138 zitaelekezwa kwa Miradi
Kwa mujibu wa Serikali, ni Euro milioni 17 tu (asilimia 10.9) ndizo ambazo zilipangwa kwenda moja kwa moja kwenye miradi inayosimamiwa na taasisi za Serikali. Kiasi kikubwa, Euro milioni 138.6, kilielekezwa kwa wadau wengine.
Mradi wa Together4Value (Euro milioni 129): Unalenga kuimarisha minyororo ya thamani katika sekta za madini na kilimo. Euro milioni 116 zitasimamiwa na mashirika ya EU na sekta binafsi.Mradi wa Uchumi wa Kidijitali (TANTECH) (Euro milioni 20): Ulibuniwa kuchochea maendeleo ya uchumi wa kidijitali. Euro milioni 18 zitaelekezwa kwa taasisi zisizo za Serikali na sekta binafsi na Mfuko wa Ushirikiano (Euro milioni 7) ambapo Euro milioni 4.5 zimepangwa kutekelezwa kupitia wataalamu elekezi.
Hivyo, Serikali inatamka kwamba itaendeleza majadiliano na EU kwa haraka ili utiaji saini ukamilike kabla ya Februari 2026, kuepuka athari kwa wadau wa maendeleo.
Kama una Taarifa, Habari, Tangazo n.k Wasiliana nasi kupitia shinyapress@gmail.com au +255 788 469 464
