MASELE AMKUBALI KATAMBI MBELE YA DK.NCHIMBI AMELETA MAENDELEO JIMBO LA SHINYANGA MJINI,AWAOMBA WANANCHI WAMREJESHE UCHAGUZI MKUU OKTOBA 29,2025
Na Marco Maduhu,SHINYANGA
Aliyekuwa Mbunge wa Jimbo la Shinyanga Mjini Stephen Masele, amemkubali Mgombea Ubunge wa Jimbo hilo Patrobas Katambi, katika Uchaguzi Mkuu wa 2025, kuwa ni mchapakazi na ameleta maendeleo makubwa jimboni humo, kwa kipindi cha miaka mitano iliyopita.
Amebainisha hayo leo Septemba 3,2025, kwenye Mkutano wa Kampeni wa Mgombea Mwenza wa Kiti cha Urais Dk.Emmanuel Nchimbi katika Jimbo la Shinyanga Mjini, wa kunadi sera na ilani ya CCM kwa wananchi wa Shinyanga ili wakichague Chama hicho katika uchaguzi Mkuu utakao fanyika Oktoba 29,2025.
Masele akizungumza mara baada ya kuagizwa na Dk.Nchimbi kumleta Mgombea Ubunge Katambi kwenye hadhara ili amnadi kwa wananchi, amesema Katambi ni kizazi kipya na amefanya maendeleo makubwa katika jimbo la Shinyanga kipindi cha miaka mitano iliyopita, hivyo anastahili kuugwa mkono na kuendelea kuwa Mbunge wa Jimbo hilo 2025-2030.
“Mimi ndiyo niliye muachia Kijiti cha Ubunge Katambi katika Jimbo hili la Shinyanga Mjini, na kama mpira mimi nilikuwa napiga basi nyingi,lakini mwenzangu akapiga kaunta “Atack”na matobo mengi akafunga goli,”amesema Masele.
“Katambi ni kizazi kipya amefanya maendeleo makubwa katika jimbo la Shinyanga Mjini,nitamuunga Mkono ili CCM ipate ushindi wa kishindo,na nitaendelea kumshauri kwa kushirikiana na wazee aendelee kuleta maendeleo hapa Shinyanga,”ameongeza Masele.
Aidha,amesema pamoja na kumuombea kura Katambi pia anawaombea kura madiwani wote wa CCM na kura nyingi kwa Mgombea Urais Dk.Samia Suluhu Hassan.
Naye,Dk.Nchimbi alimuwagia sifa Katambi kuwa amekuwa Naibu Waziri bora kabisa haijawahi kutokea na kuwaomba wananchi wa Shinyanga kwamba wampatie heshima kwa kumpigia kura nyingi za ushindi, pamoja na Madiwani wote wa CCM na Mgombea Urais Dk.Samia Suluhu Hassan, ili waendelea kuwaletea maendeleo.
Kwa upande wake Katambi,amesema Shinyanga mpya inakuja ya kuwa jijiji, sababu ya kuwapo kwa mipango mikubwa ya maendeleo kupitia Ilani ya Uchaguzi ya CCM (2025-2030)huku akieleza mambo makubwa ya kimaendeleo ambayo yametekelezwa ndani ya miaka mitano iliyopita.
Amesema kwa upande wa miundombinu,Madaraja,Makaravati na Vivuko vimetekelezwa kwa asilimia kubwa, ikiwamo na miundombinu ya barabara,masoko, na ujenzi wa Zahanati,Vituo vya Afya,ukarabati wa Hospitali ya Manispaa, na upanuzi wa uwanja wa ndege.
Amesema, mambo mengi ameyatekeleza kwa kipindi cha miaka mitano iliyopita chini ya Rais Dk,Samia Suluhu Hassan,na sasa wanajenga Stendi mpya ya Mabasi na Barabara ya Lami kwenda Hospitali ya Rufaa Shinyanga.
Aidha,Katambi amewaomba wananchi wa Shinyanga siku ya Uchaguzi Oktoba 29 kwamba wampigie kura nyingi za ushindi Mgombea Urais Dk.Samia Suluhu Hassan, Wabunge wote wa CCM pamoja na Madiwani.
TAZAMA PICHA👇👇
Mgombea Mwenza wa Kiti cha Urais Dk.Emmanuel Nchimbi akizungumza wakati wa Kampeni katika Jimbo la Shinyanga Mjini.
Aliyekuwa Mbunge wa Jimbo la Shinyanga Mjini Stephen Masele (kulia)akimnadi Mgombea Ubunge wa Jimbo hilo katika Uchaguzi Mkuu wa 2025 Patrobas Katambi kwa wananchi wa Shinyanga.
