KATAMBI AWAITA WANANCHI WA SHINYANGA WAJITOKEZE KESHO KWA WINGI KUMSIKILIZA DK.NCHIMBI
Shinyanga Mpya ya 2025-2030 inakuja
Na Marco Maduhu,SHINYANGA
Mgombea Ubunge Jimbo la Shinyanga Mjini kupitia Chama Cha Mapinduzi (CCM),katika Uchaguzi Mkuu wa 2025 Patrobas Katambi,ana waita wananchi wa Shinyanga wajitokeze kwa wingi kwenye ujio wa Mgombea Mwenza wa Kiti cha Urais CCM Dk.Emmanuel Nchimbi, kwa ajili ya kampeni za kunadi sera na ilani ya chama hicho, kuelekea kwenye uchaguzi Mkuu utakaofanyika Oktoba 29,2025.
Katambi,amebainisha hayo leo Septemba 2,2025 wakati akizungumza na waandishi wa habari, kufuatia ujio wa Dk.Emmanuel Nchimbi mkoani Shinyanga hapo kesho Septemba 3 mwaka huu.
Amesema,wananchi wanapaswa kufika kwa wingi kusikiliza mambo makubwa ambayo yametekelezwa ndani ya miaka mitano chini ya Utawala wa Rais Dk.Samia Suluhu Hassan kwa nchi nzima, pamoja na jimbo la Shinyanga Mjini, na kufahamu pia mipango mipya ya maendeleo ndani ya miaka mitano ijayo kupitia Ilani ya Uchaguzi ya (CCM) 2025-2030.
“Wananchi wa Shinyanga wajitokeze kwa wingi kwenye ujio wa Mgombea Mwenza wa Kiti cha Urais Dk.Emmanuel Nchimbi wasikilize sera za CCM kupitia Ilani yetu, na pamoja na kuijua Shinyanga Mpya ya 2025-2030,”amesema Katambi.
“Siku ya kesho tutaeleza mambo makubwa ya kimaendeleo ambayo yamefanyika kwa nchi nzima ndani ya miaka mitano iliyopita, na maendeleo yaliyopatikana katika jimbo hili la Shinyanga Mjini katika sekta mbalimbali,”ameongeza Katambi.
Aidha,kesho Septemba 3,Mgombea Mwenza Kiti cha Urais kupitia Chama Cha Mapinduzi (CCM), Dk. Emmanuel Nchimbi, anatarajiwa kuwasili mkoani Shinyanga kwa ajili ya kampeni za kunadi sera na ilani ya chama hicho kuelekea Uchaguzi Mkuu utakaofanyika Oktoba 29, 2025.
Kama una Taarifa, Habari, Tangazo n.k Wasiliana nasi kupitia shinyapress@gmail.com au +255 788 469 464
