DK.EMMANUEL NCHIMBI KUTUA SHINYANGA KUNADI SERA ZA CCM
Na Marco Maduhu,SHINYANGA
MGOMBEA Mwenza wa Kiti cha Urais kupitia Chama Cha Mapinduzi (CCM), Dk. Emmanuel Nchimbi, kesho anatarajiwa kuwasili mkoani Shinyanga kwa ajili ya kampeni za kunadi sera na ilani ya chama hicho kuelekea Uchaguzi Mkuu utakaofanyika Oktoba 29, 2025.
Katibu wa Siasa, Uenezi na Mafunzo wa CCM Mkoa wa Shinyanga, Richard Masele, amebainisha hayo leo Septemba 2, 2025, wakati akizungumza na waandishi wa habari ofisini kwake kuhusu maandalizi ya ujio huo.
Amesema Dk. Nchimbi ataanzia wilayani Kishapu saa 3 asubuhi katika viwanja vya SHIRECU–Mhunze kunadi sera na ilani ya CCM kwa wananchi.
Amesema baada ya Kishapu, saa 6 mchana Dk. Nchimbi atawasili Manispaa ya Shinyanga, ambapo atapokelewa Karogo na kuelekea katika viwanja vya JASCO, jirani na Soko la Ngokolo Mitumbani, kwa ajili ya kufanya mkutano mkubwa wa kampeni.
"Wananchi wote wa Kishapu na Shinyanga, bila kujali itikadi zao za kisiasa, wanakaribishwa kuhudhuria mikutano hiyo kusikiliza sera za CCM kupitia kwa mgombea mwenza wa Kiti cha Urais Dk.Emmanuel Nchimbi,"amesema Masele.
Ameongeza pia katika Mikutano hiyo atawanadi wagombea Ubunge na Udiwani wa CCM wa Mkoa huo kwa wananchi, ili kuhakikisha chama kinapata ushindi wa kishindo kwenye uchaguzi.
Aidha, Septemba 4, 2025 Dk. Nchimbi ataendelea na kampeni wilayani Kahama ambapo asubuhi atakuwa Isaka, kisha Kagongwa, na baadaye saa 6 mchana atahutubia wananchi katika viwanja vya Parking ya Malori karibu na Uwanja wa Taifa.
Masele amesema, katika ziara hiyo ya Dk.Nchimbi ndiyo utakuwa uzinduzi rasmi wa kampeni za CCM kwa Mkoa wa Shinyanga.
Kama una Taarifa, Habari, Tangazo n.k Wasiliana nasi kupitia shinyapress@gmail.com au +255 788 469 464


