WATENDAJI WA KATA HALMASHAURI YA MSALALA WASAINI MKATABA WA LISHE

Shinyanga Press Club October 19, 2022

Watendaji wa kata wakiwa kwenye zoezi la kusaini mikataba ya lishe katika halmashauri ya Msalala wilayani Kahama mkoani Shinyanga.

Na Kareny Masasy,Msalala

WATENDAJI wa kata 18 za halmashauri ya Msalala wilayani Kahama mkoani Shinyanga wamesaini mikataba ya utekelezaji shughuli za lishe ili kuwakomboa wajawazito na watoto.

Mikataba hiyo wamesainishwa leo tarehe 19/10/2022 na mkurugenzi wa halmashauri hiyo Charles Fussi mbele ya ofisa mratibu wa shughuli za lishe mkoa Denis Madeleka.

Fussi amesema kuwa mkataba huo unajieleza watendaji wakafanye kazi na kusimamia kuanzia ngazi ya kata,vijiji na vitongozi kuhakikisha walengwa wanapata huduma na ushauri.

Mratibu wa Lishe Denis Madeleka amesema kuwa mkataba huo unaviashiria nane,kiashiria cha kwanza ni kwenda kwa walezi wenye watoto waliochini ya umri wa miaka mitano na wajawazito kutoa elimu ya lishe na kuandaa ripoti .

‘Hapa msalala kuna vituo vya kutolea huduma takribani 30 pia kuna fomu ambazo watakuwa wakizijaza kupitia vituo hivyo kwa kushirikiana na wasimamizi wa lishe kwenye vituo na watoa huduma ngazi za jamii ambao walikwisha patiwa mafunzo”amesema Madeleka.

Madeleka amesema matone ya vitamin A ,utolewaji wa dawa za minyoo ,na utolewaji wa dawa za Follic Acid kwa wajawazito wakasimamie na wajue bajeti yake ni sh ngapi na taarifa hizi zianze kutolewa kwenye vikao vya maendeleo ya kata (WODC).

Mdeleka amesema watoto wenye utapiamlo wa kadiri na mkali waibuliwe na kutolewa taarifa zao na kupelekwa kwenye vituo wakapatiwe matibabu pia kuna muongozo umeandaliwa wa wanafunzi kuanza kupata chakula cha mchana shuleni kupitia kamati zitakazo kuwa zinasimamia.

Kaimu afisa lishe halmashauri ya Msalala Peter Shimba amesema wameonekana kufanya vibaya suala la lishe kwenye eneo la shule kwaajili ya kutopata watoto chakula mashuleni hilo nalo lisisitizwe kwa wazazi ili wasiwe na alama mbaya.

Elimu muende mkaitoe kwa kuainisha makundi matano ya vyakula na umuhimu wake mwilini kwani watoto wakipata afya njema hata uelewa unakuwa mzuri darasani na kuwepo na taifa imara.

Mtendaji wa kata ya Bugarama Prisca Pius amesema mkataba huo wameupokea na wataufanyia kazi kama ilivyoelekezwa kwa kushirikiana na wahudumu ngazi ya jamii pamoja na wahudumu wa lishe kwenye vituo afya.