TRA -MKOA WA KIKODI KAHAMA YAWATAKA WAFANYABIASHARA KUTUNZA KUMBUKUMBU ZAO.

Baadhi ya wafanyabiashara halmahsuari ya Ushetu wakimsikiliza afisa msimamizi wa kodi kanda ya ziwa kutoka mamlaka ya mapato Tanzania (TRA) Morgan Isdory.

Na Neema Sawaka, Kahama

MAMLAKA ya mapato Tanzania (TRA) mkoa wa kodi Kahama Imewataka wafanyabiashara kutunza kumbukumbu zao za biashara kwa mujibu wa sheria ya fedha ya mwaka 2022 .

Afisa msimamizi wa kodi kutoka kanda ya ziwa Morgan Isdory amesema hayo jana wakati akitoa elimu ya mlipa kodi kwa wafanyabiashara wa halmashauri ya Ushetu.

Isidory amesema wapo pia wafanyabiashara ambao wamekuwa na mashine za EFD na kutotoa risiti kabisa kwa mteja na wengine kutoa bei pungufu kwenye bidhaa tofauti na uhalisia hilo ni kosa na faini yake ni kifungo cha miaka mitatu au kulipa sh Millioni tatu.

Isdory amesema nchi zilizoendelea ukwepaji wa kodi ni kosa la jinai ndiyo maana hapa Tanzania mara kwa mara kumekuwepo maboresho ya kanuni na sheria.

Isdory amesema kwa mujibu wa sheria ya fedha ya mwaka 2022 inaeleza kodi itatozwa kwenye faida kwa mfanyabiashara awe na uwezo wa kutunza kumbukumbu.

“Uzingatiaji wa kifungu cha 35 cha sheria ya usimamizi wa kodi na utunzaji wa kumbukumbu ni muhimu kwa kumfanyabiashara”amesema Isdory.

Isdory amesema mfanyabiashara asiye na kumbukumbu makadirio yanaweza kuwa sahihi au yasiwe sahihi kwake.

Isdory amesema kanuni za kodi zinaeleza gharama ya usafirishaji haitakiwi kuzidi kodi anayotakiwa kulipa mfanyabiashara.

Baadhi ya wafanyabiashara waliohudhulia kupata elimu hiyo Msabaha Issa na Ramadhani Ngau wamesema kodi zimekuwa nyingi kwa mfanyabiashara zingine zipunguzwe ili wapate faida.