Tanzania imeendelea kung’ara katika anga za kimataifa baada ya kampuni ya kizalendo ya Caps Limited kutwaa tuzo mbili za heshima katika Shindano la Ubora wa Taasisi na Makampuni kwa nchi za Jumuiya ya Maendeleo Kusini mwa Afrika (SADC).
Katika kilele cha mashindano hayo yaliyofanyika jijini Johannesburg, Afrika Kusini, kampuni hiyo inayojishughulisha na udhibiti wa wadudu na huduma za vyoo vya kibiolojia, imeibuka mtoa huduma bora wa mwaka (SADC Service of the Year) na mshindi wa pili wa kampuni bora ya mwaka katika kanda hiyo.
Mafanikio haya ni kielelezo tosha kuwa bidhaa na huduma za Kitanzania sasa zina uwezo wa kushindana na kushinda dhidi ya mataifa makubwa kiuchumi barani Afrika.
Mkurugenzi Mtendaji wa Caps Limited, Peter Marealle, ameeleza kuwa ushindi huo ni matokeo ya dhamira ya dhati ya kutoa huduma zinazokidhi viwango vya kimataifa, jambo linalowapa wawekezaji wa nje imani na kampuni za wazawa.
Siri ya mafanikio hayo imetajwa kuwa ni uwazi katika utendaji na uzingatiaji wa taratibu za kimataifa, huku ushirikiano kutoka Wizara ya Viwanda na Biashara pamoja na Shirika la Viwango Tanzania (TBS) ukichangia kwa kiasi kikubwa kuifanya kampuni hiyo kutambulika nje ya mipaka.
Ushindi wa Caps Limited haukuja kwa bahati mbaya, kwani kampuni nyingine kubwa kama Said Salim Bakhressa pia imenyakua tuzo ya bidhaa bora ya mwaka, jambo linaloonesha kuwa Tanzania ina lulu nyingi za kibiashara.
Meneja Ubora wa Caps Limited, Noela Mkusu, ameupongeza uongozi wa Rais Samia Suluhu Hassan kwa kuweka mazingira wezeshi yaliyozipa kampuni za ndani ujasiri wa kuvuka mipaka. Rai imetolewa kwa Serikali kuendelea kuzibeba kampuni za kizalendo ili zifikie hatua ya kusafirisha bidhaa na huduma zao kwa wingi zaidi nje ya nchi, jambo litakaloongeza fedha za kigeni na kukuza uchumi wa taifa.
Uwepo wa amani na utulivu nchini ndio uliotoa fursa kwa makampuni haya kukua na kufikia hadhi ya kushindana na makampuni makubwa ya SADC na Afrika Mashariki.
Mafanikio haya ya Caps Limited, ambayo pia imewahi kung’ara katika tuzo za Afrika Mashariki mwaka 2022 na 2024, ni ujumbe kwa ulimwengu kuwa Tanzania si tu soko la bidhaa za nje, bali ni kitovu cha wataalam na huduma bora. Hii ni hatua kubwa katika kuelekea Dira ya Maendeleo 2050, ambapo kampuni za wazawa zinatarajiwa kuwa injini ya mabadiliko ya kiuchumi na kijamii nchini na barani kote.
Kama una Taarifa, Habari, Tangazo n.k Wasiliana nasi kupitia shinyapress@gmail.com au +255 788 469 464
