Uzalishaji wa nishati ya umeme nchini Tanzania umefikia hatua kubwa ya kimkakati baada ya taifa kufanikiwa kufikisha uwezo wa kuzalisha jumla ya megawati 4,400 huku matumizi ya sasa yakiwa ni megawati 2,071 pekee.
Hatua hii inaacha ziada ya zaidi ya megawati 2,300 ambayo ni kichocheo kikubwa cha kiuchumi kinacholenga kuimarisha sekta ya viwanda na shughuli mbalimbali za uzalishaji nchini.
Taarifa hiyo iliyotolewa Februari 20, 2026, kufuatia ukaguzi wa miradi ya umeme jijini Dar es Salaam uliofanywa na Kamati ya Kudumu ya Bunge ya Nishati na Madini, inadhihirisha kuwa nchi sasa imejivua rasmi vazi la mgao wa umeme na kuingia katika zama za nishati ya uhakika.
Mwenyekiti wa kamati hiyo, Subira Mgalu, amebainisha kuwa uwepo wa ziada hii ya umeme umepunguza kwa kiasi kikubwa kero ya kukatika kwa nishati hiyo, jambo ambalo ni habari njema kwa wafanyabiashara na wawekezaji wanaohitaji utulivu wa nishati ili kukuza tija.
Katika kuimarisha ustawi wa jamii na uchumi wa mtu mmoja mmoja, msisitizo umewekwa kwa shirika la TANESCO kuhakikisha miundombinu ya usambazaji inaimarishwa kutoka vyanzo vikuu kama Bwawa la Julius Nyerere kuelekea maeneo ya kimkakati kama Chalinze, Kinyerezi, na Mkuranga.
Kwa mtazamo wa muda mrefu kuelekea Dira ya 2050, serikali imejipanga kufikisha uzalishaji wa megawati 8,000 ifikapo mwaka 2030 ili kukidhi mahitaji yanayokua kwa kasi ya soko la ndani na nje. Lengo hili linaambatana na dhamira ya kuunganisha takribani wananchi milioni 1.7 kwenye nishati ya umeme kila mwaka, hali itakayotoa uhakika kwa sekta binafsi kuwekeza kwa mapana zaidi.
Uhakika huu wa nishati si tu unashusha gharama za uzalishaji, bali unaifanya Tanzania kuwa kitovu cha uwekezaji barani Afrika, ukifungua milango ya ajira zisizo na idadi na kuimarisha kipato cha wananchi kupitia viwanda na teknolojia.
Kama una Taarifa, Habari, Tangazo n.k Wasiliana nasi kupitia shinyapress@gmail.com au +255 788 469 464
