Na Marco Maduhu,SHINYANGA
MGOMBEA urais kupitia Chama cha Wananchi (CUF), Gombo Samandito Gombo, amewasihi wananchi wa Shinyanga kukipa kura nyingi chama hicho katika Uchaguzi Mkuu wa Oktoba 29, 2025 akiahidi kuwaletea maendeleo ya kweli.
Amenadi sera hizo leo Septemba 4,2025 kwenye mkutano wa kampeni uliofanyika katika eneo la stendi ya mabasi ya Wilaya ya Shinyanga Mjini.
Gombo ameahidi iwapo Watanzania watampatia ridhaa ya kuingia Ikulu, hatua ya kwanza atakayochukua ni kumtoa gerezani Tundu Lissu ili awe huru na kusimamia mchakato wa Katiba Mpya ambayo amesema ni kilio cha wananchi wengi.
Pia ameahidi kufuta gharama zote za matibabu, kutoa elimu bure kuanzia awali hadi chuo kikuu, pamoja na kufuta kikokotoo cha pensheni.
Vilevile amesema serikali ya CUF itapitia upya mikataba yote yenye utata ikiwamo ya bandari ili kuhakikisha rasilimali za taifa zinawanufaisha wananchi.
“Naombeni sana wananchi wa Shinyanga siku ya uchaguzi Oktoba 29 mpigie kura CUF kwa nafasi ya madiwani, wabunge na rais ili tupate kuwaletea maendeleo ya kweli,” amesema Gombo.
Kwa upande wake Mgombea Mwenza, Husna Abdallah, amesema iwapo watashinda wataubadilisha mji wa Shinyanga kiuchumi kutokana na utajiri wake wa madini, lakini kwa sasa rasilimali hizo hazijawanufaisha wananchi.
“Tutawatendea haki sawa Watanzania wote. Uamuzi sasa uko mikononi mwa wananchi wenyewe siku ya kupiga kura,” amesema Husna.
Nao Wagombea Ubunge wa CUF akiwamo Mshandete Gerald (Shinyanga Mjini) na Enock Julius (Mbongwe), wamesema chama pekee kilichobaki kwa ajili ya kuleta maendeleo ya kweli ni CUF na kuwataka wananchi wakiamini na kukipigia kura nyingi.
TAZAMA PICHA👇👇
Mgombea Urais kiti cha Urais CUF Gombo Samandito Gombo akinadi sera kwa wananchi wa Shinyanga.
Mgombea Mwenza wa Kiti cha Urais CUF Husna Abdallah akinadi sera kwa wananchi.
Mgombea Ubunge Jimbo la Mbogwe Enock Julius akinadi sera za CUF.
Mgombea Ubunge Jimbo la Shinyanga Mjini Mshandete Gerald akinadi sera za CUF.
