Na Marco Maduhu, SHINYANGA
Wafugaji katika Manispaa ya Shinyanga, wameishukuru serikali kwa kuanza zoezi la utoaji wa chanjo ya mifugo, wakieleza kuwa hatua hiyo itaboresha afya ya mifugo yao na kuongeza tija kwenye sekta hiyo.
Wamebainisha hayo katika zoezi la uzinduzi wa chanjo hiyo uliofanyika katika mnada wa Old Shinyanga.
Mmoja wa wafugaji hao Juma Bugohe, amesema zoezi hilo ni faraja kubwa kwao na litawasaidia kulinda mifugo dhidi ya magonjwa hatari.
“Naishukuru serikali kwa kutupatia chanjo hizi ambazo zitasaidia sana mifugo yetu kuwa salama na kuikinga na magonjwa,” amesema Bugohe.
Naye Mwenyekiti wa Kijiji cha Old Shinyanga Doto Bwire, alisema wamehamasisha wafugaji wengi kujitokeza kwa kuwa chanjo hizo ni salama na zinatolewa kwa gharama nafuu.
Mkuu wa Idara ya Kilimo na Mifugo Manispaa ya Shinyanga, Revocatus Lutunda, amesema chanjo hizo zitaongeza ubora wa mifugo ili ikidhi masoko ya ndani na nje ya nchi.
“Naishukuru serikali kwa sababu chanjo hii itaenda kuboresha afya ya mifugo na kuhakikisha inakuwa na ubora unaotakiwa ili kukidhi masoko ya ndani na nje ya nchi,” amesema Lutunda.
Afisa Mifugo wa Manispaa ya Shinyanga Jumapili Robert, amesema Manispaa hiyo imepokea dozi 45,000 za chanjo ya homa ya mapafu kwa ajili ya ng’ombe, na dozi 22,000 za sotoka kwa ajili ya mbuzi na kondoo, pamoja na dozi 230,000 za kideri na mafua ya kuku.
Ameongeza kuwa pia wametengewa masanduku 30 ya kuhifadhia chanjo hizo, na zaidi ya sindano 30 kwa ajili ya utekelezaji wa zoezi hilo.
Aidha, Kaimu Katibu Tawala wa Wilaya ya Shinyanga, Neema Rwegoshora, aliwahimiza wafugaji kupeleka mifugo kwa wingi kupatiwa chanjo, akibainisha kuwa ni salama na nyenzo ya kuboresha ustawi wa mifugo.
