WAZAZI NA WALEZI WATAKIWA KUTENGA MUDA WA KUZUNGUMZA NA WATOTO WAO

Ma Mchungaji Baraka Laizer wa Kanisa la Philadelfia Miracle Temple Evaline Msangi akiwa kwenye picha ya pamoja na watoto kwenye sherehe yao

Suzy Luhende, Shinyanga Press

Wazazi na walezi wametakiwa kuwalea watoto wao katika maadili mema ya kumpendeza Mungu, kuwahimiza kwenda kanisani kwa ajili ya kujifunza neno la Mungu, pamoja na kutenga muda wa kuzungumza na watoto wao, ili wasijiingize kwenye vitendo visivyompendeza Mungu

Agizo hilo limetolewa na mama mchungaji wa kanisa la Philadelfia Miracle Temple
Evaline Msangi
lililopo katika kata ya Ndembezi Manispaa ya Shinyanga kwenye sherehe ya watoto iliyofanyika kanisani hapo, ambapo amewataka wazazi kuwahimiza watoto wao kwenda kanisani kujifunza neno la Mungu.

Evaline amesema wazazi wengi wamekuwa hawatengi muda wa kuzungumza na watoto wao kwani wanakuwa wapo bize na shughuli zao na hawawahimizi watoto kwenda kanisani kujifunza neno la Mungu, hivyo amewaomba wahamasishe watoto wapende ibada ili baadae waweze kuwa na kizazi kinachomjua Mungu.

"Niwaombe wazazi tuwaombee watoto wetu ili wasijiingize kwenye vitendo visivyo na maadili mema, na tuwalee katika maadili mema ya kumpendeza Mungu katika siku zote za maisha yao wamjue Mungu na kumtumikia, hivyo tusiwaache watoto nyumbani wakajifunza mambo ya mitaani ambayo wewe mzazi huyapendi utajisikia vibaya "amesema Evaline.

"Tuwafundishe neno la Mungu watoto wetu ili baadae tuweze kuwa na furaha, ni kweli tunakimbizana na maisha ili kuweza kujipatia chochote lakini tukumbuke kuweka muda wa kuzingumza na watoto wetu,pia niwapongeza walimu wanaofundisha watoto na ninawashukuru watoto wote waliohudumu katika wiki lote la watoto kwani mmefanya vizuri na Mungu aendelee kuwatumia mkaendelee kufanya mambo makubwa zaidi"amesema Evaline.

Kwa upande wake mchungaji Anania Clementi amewapongeza watoto kwa huduma wslioifanya katika sherehe yao hivyo amewaomba waendelee kumtumikia Mungu kwa nguvu zote ili baadae wakawe watumishi wazuri.

Mmoja wa watoto hao Dainess Ditrick amesema anamshukuru Mchungaji kiongozi wa kanisa hilo Baraka Laizer kwa kuendelea kuwalea vizuri na kuwafundisha neno la Mungu, hivyo ameomba kwaya ya watoto iendelee kuhudumu siku za ibada kwa ajili ya kumtukuza Mungu na kukuza vipaji vya uimbaji kwa watoto

Aidha Mwalimu Dionisio Kaijage ambaye ni mwenyekiti wa Chama Cha wanawake wa kanisa hilo amewapongeza watoto kwa kufanya huduma nzuri kanisani ya uimbaji, kuhubiri na kufanya huduma zingine mbalimbali, ambapo aliguswa kutoa zawadi kwa watoto wote wa kanisa hilo

Mwalimu wa watoto wa kanisa la Philadelfia Miracle Temple Neema Fredrick akiwa kwenye picha ya pamoja na watoto

Ma Mchungaji wa Kanisa la Philadelfia Miracle Temple Evaline Msangi akizungumza na kuwasihi watoto waishi katika maadili mema ya kumpendeza Mungu

Mwalimu wa watoto wa kanisa la Philadelfia Miracle Temple Neema Fredrick akizungumza na kuwaomba wazazi wawaruhusu watoto kwenda kanisani ili kujifunza yaliyo mema