POLISI SHINYANGA WAPANDA MITI KUKABILIANA NA MABADILIKO YA TABIA NCHI, DC MBONEKO APIGA MARUFUKU UKATAJI MITI HOVYO BILA KIBALI

Maduhu January 13, 2023

Kamanda wa Jeshi la Polisi mkoani Shinyanga Janeth Magomi (kushoto) akiwa na Mkuu wa wilaya ya Shinyanga Jasinta Mboneko wakipanda miti.

Na Marco Maduhu, SHINYANGA

JESHI la Polisi mkoani Shinyanga, limepanda miti katika Hospitali ya Rufaa mkoani Shinyanga iliyopo Mwawaza na Kambi ya Jeshi hilo, ili kuboresha mazingira pamoja na kukabiliana na mabadiliko ya tabia nchi.

Zoezi hilo la upandaji miti limefanyika leo Januari 13, 2023 na kupandwa miti 1000, ambapo katika kambi ya Jeshi la Polisi (FFU) imepandwa miti 200 na Hospitali ya Rufaa imepadwa miti 800 ya matunda na kivuli.

Amesema Jeshi hilo linaunga mkono juhudi za Rais Samia Suluhu Hassan, katika kampeni ya upandaji miti ili kuboresha mazingira na kukabiliana na mabadiliko ya tabia nchi.

“Jeshi la Polisi mkoani Shinyanga tumepanda Miti 1000, ambapo Miti 800 tumepanda hapa katika hospitali ya Rufaa ya Mkoa, na Miti 200 tumeipanda kambini, lengo ni kuunga juhudi za viongozi wetu katika kampeni ya upandaji miti kuboresha mazingira na kukabiliana na mabadiliko ya tabia nchi,”amesema Magomi.

Naye Mkuu wa wilaya ya Shinyanga Jasinta Mboneko, amepongeza Jeshi la Polisi kwa upandaji miti, huku akipiga marufuku ukaji wa miti hovyo bila ya kuwa na vibali, pamoja na wafugaji kupitisha mifugo yao kwenye miti na kuiharibu.

“Katika kampeni ya upandaji miti tunataka Shinyanga iwe ya kijani, na miti ambayo tunaipanda ilindwe na ikue, na tunatekeleza maagizo ya Makamu wa Rais ya kupanda Miti milioni 1.5 kila mwaka na Shinyanga tunakwenda vizuri,”amesema Mboneko.

Mganga Mfawidhi wa Hospitali ya Rufani mkoani Shinyanga Dk, Luzila John, amesema hospitali hiyo ni mpya ambayo ipo Mwawaza na kushukuru upandaji huo wa miti ili kuboresha mazingira na kuahidi kuitunza miti hiyo.