📌Naibu Waziri ahimiza uwekezaji wa mitaji ya ubia na uwekezaji wa hisa katika kampuni binafsi.
📌Aeleza umuhimu wa kulinda haki za wabunifu na wawekezaji ili kuchochea ukuaji wa biashara.
📌Wajasiriamali wahimizwa kuimarisha utawala bora, uwazi na maandalizi ya biashara zinazovutia wawekezaji.
DAR-ES-SALAAM, 20 OKTOBA 2026
Naibu Waziri wa Viwanda na Biashara, Dennis Londo (Mb), ametoa wito kwa wadau wa sekta ya umma na binafsi kushirikiana kuimarisha upatikanaji wa mitaji kwa biashara changa (startups) ili kukuza ubunifu, kuongeza uwekezaji na kuchochea maendeleo ya sekta binafsi nchini.
Wito huo umetolewa Oktoba 20 katika Kongamano la Wiki ya Biashara Bunifu Tanzania 2026 (Tanzania Startup Week 2026), linalofanyika jijini Dar es Salaam, ambapo siku ya pili, imejikita katika mada ya ufadhili wa biashara changa, mitaji ya ubia na mfumo wa uwekezaji (Startup Financing, Venture Capital & Investment Ecosystem).
Londo amesisitiza umuhimu wa kuimarisha mifumo mbadala ya ufadhili, ikiwemo mitaji ya ubia (venture capital) na uwekezaji wa hisa katika kampuni binafsi (private equity), akieleza kuwa mifumo hiyo inaweza kusaidia biashara changa kupata mitaji ya kukuza shughuli zao bila kutegemea mikopo ya benki pekee.
Ameeleza kuwa mazingira rafiki ya uwekezaji yanahitaji ushirikiano wa wadau wote, pamoja na mifumo inayolinda haki za wabunifu na wawekezaji. Hatua hizo ni muhimu katika kujenga imani, kuvutia mitaji na kuhakikisha biashara bunifu zinapata fursa ya kukua na kuchangia uchumi wa taifa.
Aidha, amewahimiza wajasiriamali kujiandaa kikamilifu kwa uwekezaji kwa kuwa na mipango madhubuti ya biashara, mifumo ya uwazi na usimamizi bora. Amesisitiza kuwa utayari huo unaweza kuongeza imani ya wawekezaji na kurahisisha upatikanaji wa mitaji kwa ajili ya kupanua biashara.
Londo amebainisha kuwa juhudi za kukuza mfumo wa biashara bunifu zinahitaji ushiriki wa taasisi za serikali, wawekezaji wa ndani na nje, taasisi za kifedha, wasimamizi wa mifuko ya uwekezaji na wajasiriamali wenyewe.
Ushirikiano huo unaweza kusaidia kuunganisha biashara zinazohitaji mitaji na wawekezaji wenye nia ya kufadhili mawazo na shughuli zenye fursa za kukua.
