Baadhi ya washiriki wa mafunzo ya udereva katika chuo cha VETA Shinyanga
Mkufunzi wa Udereva kutoka VETA Shinyanga, Axivier Msolla, akiwa darasani akitoa mafunzo kwa washiriki
Na Mwandishi wetu,Shinyanga
Katika jitihada za Serikali za kupunguza ajali za barabarani zinazochangiwa na makosa ya kibinadamu, Chuo cha Ufundi Stadi (VETA) Mkoa wa Shinyanga kimeanza kutoa mafunzo maalum ya kuwajengea uwezo wakufunzi wa vyuo vya udereva kutoka mikoa ya Kanda ya Magharibi na Kanda ya Ziwa, kwa lengo la kuimarisha ubora wa ufundishaji na kuzalisha madereva wenye taaluma, maadili na uelewa wa sheria za usalama barabarani.
Mafunzo hayo yanawakutanisha wakufunzi wa vyuo mbalimbali vya udereva kutoka mikoa ya Shinyanga, Tabora, Geita, Simiyu, Kagera, Kigoma, Mwanza na maeneo mengine, ambapo wanapatiwa mbinu za kisasa za ufundishaji wa udereva, matumizi sahihi ya mtaala wa mafunzo pamoja na uelewa wa sheria, kanuni na taratibu za usalama barabarani zinazolenga kulinda maisha ya watumiaji wa barabara.
Kwa mujibu wa VETA, hatua hiyo inalenga kuhakikisha wakufunzi wanaofundisha madereva nchini wanakuwa na viwango vinavyofanana vya kitaaluma, ili madereva wanaohitimu kutoka katika vyuo hivyo wawe na uwezo wa kuendesha vyombo vya moto kwa usalama, kuwajibika barabarani na kuzingatia sheria za usalama wa barabarani.
Mafunzo hayo pia yanakuja katika kipindi ambacho ajali za barabarani zimeendelea kuwa changamoto kubwa nchini, huku sehemu kubwa ya ajali hizo zikihusishwa na makosa ya kibinadamu, ukiukwaji wa sheria za usalama barabarani, pamoja na ukosefu wa maarifa ya kutosha kwa baadhi ya madereva kuhusu matumizi salama ya barabara.
Baadhi ya washiriki wa mafunzo hayo wamesema programu hiyo imewasaidia kupata maarifa mapya kuhusu mbinu bora za kufundisha udereva, namna ya kuwaandaa madereva wanaotambua wajibu wao barabarani, pamoja na umuhimu wa kuzingatia maadili ya taaluma ya udereva.
Wamesema kuwa wakufunzi ndiyo msingi wa kuzalisha madereva bora, hivyo kuwajengea uwezo kutasaidia kupunguza ajali zinazotokana na uzembe, mwendo kasi, matumizi yasiyo sahihi ya sheria za barabarani na maamuzi mabaya yanayofanywa na baadhi ya madereva.
Kwa upande wake, Mkufunzi wa Udereva kutoka VETA Shinyanga, Axivier Msolla, amesema mafunzo hayo yanawapa wakufunzi fursa ya kubadilishana uzoefu na kujifunza mbinu mpya za ufundishaji zinazokidhi mahitaji ya sasa ya sekta ya usafiri na usalama barabarani.
Nao wakufunzi kutoka Tabora na Biharamulo, Athuman Mohammed na Jekonia Shedrack, wamesema elimu waliyoipata itawasaidia kuongeza ubora wa mafunzo wanayotoa katika vyuo vyao, hatua itakayochangia kuandaa madereva wenye ujuzi, nidhamu na uwezo wa kufanya maamuzi sahihi wanapokuwa barabarani.
Akizungumza kwa niaba ya Chuo cha VETA Shinyanga, Kaimu Mkuu wa chuo hicho, Rashid Ntahigiye, amesema mafunzo hayo ni sehemu ya mkakati wa VETA wa kuendelea kuboresha ubora wa mafunzo ya udereva nchini kwa kuanza na kuwajengea uwezo wakufunzi, ambao ndiyo nguzo muhimu katika kuzalisha madereva wenye weledi.
Amesema VETA itaendelea kushirikiana na mamlaka mbalimbali zinazohusika na usalama barabarani ili kuhakikisha mafunzo yanayotolewa yanazingatia viwango vya kitaifa na kimataifa, kwa lengo la kuchangia juhudi za Serikali za kupunguza ajali za barabarani, kulinda maisha ya wananchi na kupunguza athari za kijamii na kiuchumi zinazotokana na ajali hizo
