Kuna msemo unasema, "Muda mzuri wa kupanda mti ulikuwa miaka 20 iliyopita, lakini muda wa pili bora ni sasa." Usemi huu umepata maana mpya mkoani Iringa wakati wa kilele cha MISA TAN Summit 2026, ambapo waandishi wa habari nchini waliamua kuacha mcharazo na kalamu zao kando na kuingia shambani.
Katika Shamba la Miti la Ihefu, ambalo liko ndani ya Msitu mkuu wa Sao Hill, wanahabari wameweka alama kwa kupanda zaidi ya miti 100, wakituma ujumbe mzito kuwa uhifadhi si kazi ya serikali pekee, bali ni fursa ya kiuchumi na wajibu wa kizalendo.
Shamba la Ihefu, lenye ukubwa wa hekta 17,670.53, si tu pori la miti; ni kiwanda cha asili na mhimili mkuu wa uchumi wa kanda ya kusini.
Kwa upande wa kijasusi wa kiuchumi, kila mti uliopandwa na wanahabari hawa unawakilisha malighafi ya mbao, karatasi, na nguzo za umeme kwa miaka ijayo. Hii ni "dhahabu ya kijani" ambayo vijana wa Kitanzania wanapaswa kuifungulia macho, kwani mahitaji ya mazao ya misitu yanazidi kuongezeka kila kukicha huku ardhi ya Iringa ikibaki kuwa rafiki kwa uwekezaji huu wa muda mrefu.
Upandaji huu wa miti ndani ya Ihefu una faida lukuki zinazovuka mipaka ya kipato cha fedha pekee. Kimazingira, miti hii inafanya kazi ya siri ya kufyonza hewa ukaa na kuzalisha oksijeni, huku mizizi yake ikilinda vyanzo vya maji na kuzuia mmomonyoko wa udongo.
Hili ni darasa tosha kwa kijana anayetafuta "Partner" wa maendeleo; shamba la miti ni mshirika anayekua wakati wewe umelala, akiongeza thamani kila sekunde bila kuhitaji kelele wala malumbano, bali usimamizi makini na uvumilivu.
Ushiriki wa waandishi wa habari, ukiongozwa na Mwenyekiti wa MISA Tanzania, Edwin Soko, ni mwito wa wazi kwa vijana kuacha kulalamika pembeni na badala yake kuanza kuandika historia zao kupitia ardhi. Ikiwa wanahabari wameweza kuacha ofisi na kuingia shambani kuonyesha njia, kijana unangoja nini?
Huu ni wakati wa vijana kujitokeza na kuwa sehemu ya "muungano wa kijani," wakipanda miti kwenye maeneo yao na kulinda iliyopo. Kumbuka, mti mmoja uliopandwa leo Ihefu ni ishara ya utajiri na uhai wa kesho. Tanzania haiitaji wapiga kelele, inahitaji wenye majembe wanaojua thamani ya kijani katika mifuko yao na katika mapafu ya taifa.
