Vijana wanaojihusisha na sanaa ya uchongaji vinyago katika Wilaya ya Monduli mkoani Arusha wametoa rai nzito kwa vijana wenzao nchini kote kudumisha tunu ya amani na utulivu kama nguzo kuu ya ukuaji wa uchumi wa mtu mmoja mmoja na taifa kwa ujumla.
Wakizungumza kwa hisia juu ya mustakabali wa maisha yao, wasanii hao wamebainisha kuwa bila kuwepo kwa utulivu wa kisiasa na kijamii, shughuli za kitalii ambazo ndizo tegemeo kubwa la mikoa ya kaskazini haziwezi kushamiri na hivyo kuwaacha vijana wengi bila kipato.
Mmoja wa wasanii hao mbunifu, Mziko Mtambike, ameeleza kuwa sekta ya utalii ina mnyororo mrefu wa thamani ambao unaunganisha kuanzia mbuga za wanyama hadi kwenye mikono ya mchonga vinyago aliyeko kijijini.
Mtambike amefafanua kuwa soko la bidhaa za sanaa nchini linategemea kwa kiasi kikubwa watalii kutoka nje ya nchi ambao ndio wanunuzi wakuu wa kazi hizo za mikono. Hivyo, vurugu au hali yoyote ya kutokuaminika kwa usalama wa nchi husababisha watalii kughairi safari zao na kuleta athari za moja kwa moja kwenye mifuko ya wasanii wadogo.
Vijana hawa wa Monduli wamesisitiza kuwa amani si suala la kisiasa pekee bali ni hitaji la msingi la kibiashara ambalo linaamua nani anakula na nani analala njaa.
Wamebainisha kuwa kupungua kwa idadi ya watalii kutokana na hofu ya machafuko kunaharibu soko la sanaa na kurudisha nyuma juhudi za serikali za kutatua changamoto ya ajira kwa vijana. Kwa maoni yao, amani iliyopo sasa nchini ndiyo inayowezesha wao kuendelea na kazi zao za ubunifu na hatimaye kuchangia katika Dira ya Taifa ya Maendeleo ya mwaka2050 inayolenga uchumi wa kati na wa juu.
Wakati watalii wanapofika nchini kwa ajili ya kutembelea hifadhi, wanagusia maisha ya vijana wengi kuanzia kwa madereva, wahudumu wa hoteli, hadi kwa wasanii wa uchongaji kama hawa wa Monduli. Hii inaashiria kuwa kuvurugika kwa amani ni kuvunja mnyororo wa riziki wa maelfu ya vijana ambao wamejiajiri kupitia vipaji vyao na utajiri wa rasilimali asilia za nchi.
Wito wa wasanii hawa unakuja kama ukumbusho muhimu kwa nguvu kazi ya taifa kuwa mlinzi wa kwanza wa amani ni mwananchi anayenufaika na utulivu huo. Wanashauri kuwa vijana wanapaswa kuwa mstari wa mbele kukulinda utulivu wa nchi ili kuendelea kuwavutia wawekezaji na wageni ambao ndio injini ya biashara zao.
Kupitia amani, sanaa ya uchongaji inaweza kuwa ajira rasmi na yenye tija inayomtoa kijana kwenye umaskini na kumfanya kuwa mshiriki hai katika ujenzi wa uchumi wa taifa.
Huu ni ushindi wa watanzania wote kuona kuwa sasa elimu ya uraia na uchumi inawafikia vijana hadi ngazi ya chini, ambapo sasa wanatambua kuwa usalama wa taifa ndio usalama wa biashara na ajira zao. Kwa kudumisha utulivu, Tanzania itaendelea kuwa kivutio kikuu cha utalii duniani, jambo ambalo litaendelea kuleta fedha za kigeni na kukuza diplomasia ya uchumi kuanzia ngazi ya kijiji hadi kimataifa.
Kama una Taarifa, Habari, Tangazo n.k Wasiliana nasi kupitia shinyapress@gmail.com au +255 788 469 464
