Mwenyekiti wa Jumuiya ya Wazazi CCM Wilaya ya Shinyanga Mjini, Mzee Fue Mrindoko, akipanda mti ikiwa ni sehemu ya maadhimisho ya miaka 49 ya CCM.
Jumuiya ya Wazazi ya Chama cha Mapinduzi (CCM) Wilaya ya Shinyanga Mjini imeendelea kuthibitisha dhamira ya CCM ya kuunganisha siasa na maendeleo endelevu kwa vitendo, baada ya kushiriki shughuli za kijamii zenye mguso wa moja kwa moja kwa jamii, ikiwemo zoezi la upandaji miti katika Shule ya Msingi Ujamaa iliyopo Seseko, Kata ya Mwamalili, Manispaa ya Shinyanga.
Shughuli hiyo imefanyika leo Januari 26, 2026, ikiwa ni sehemu ya wiki ya maadhimisho ya miaka 49 ya kuzaliwa kwa CCM, kwa lengo la kuhamasisha utunzaji wa mazingira, kupambana na athari za mabadiliko ya tabianchi pamoja na kuunga mkono juhudi za Serikali ya Awamu ya Sita katika kulinda na kuhifadhi mazingira kwa maendeleo endelevu ya taifa.
Akizungumza kama mgeni rasmi, Katibu wa Jumuiya ya Wazazi CCM Mkoa wa Shinyanga, Bi. Regina Ndulu, amewahimiza wanachama wa CCM na wananchi kwa ujumla kuendelea kushiriki kikamilifu katika upandaji miti na kuhakikisha miti hiyo inatunzwa, akisisitiza kuwa mazingira salama ni msingi wa ustawi wa jamii na uchumi wa taifa.
Bi. Regina amesema kuwa utunzaji wa mazingira ni ajenda ya kimkakati ya CCM, inayokwenda sambamba na falsafa ya chama ya kujenga taifa lenye uchumi imara, afya bora na maisha endelevu kwa kizazi cha sasa na kijacho.
Kwa upande wake, Mwenyekiti wa Jumuiya ya Wazazi CCM Wilaya ya Shinyanga Mjini, Fue Mrindoko, amesema jumuiya hiyo itaendelea kuwa mstari wa mbele katika kuunga mkono juhudi za Serikali na chama katika nyanja za maendeleo ya kijamii, kiuchumi na kimazingira, akibainisha kuwa mazingira bora ni nguzo muhimu ya afya ya wananchi na ustawi wa jamii.
Mzee Fue ameongeza kuwa Jumuiya ya Wazazi CCM itaendelea kuwahamasisha wanachama wake kushiriki kikamilifu katika shughuli za uhifadhi wa mazingira, ikiwemo upandaji na utunzaji wa miti, kama njia ya kulinda vyanzo vya maji, kupunguza ukame na kukabiliana na athari za mabadiliko ya tabianchi.
Aidha, viongozi hao wametumia fursa hiyo kuipongeza Serikali kwa juhudi zake katika kusambaza na kuhamasisha matumizi ya nishati safi ya kupikia, ikiwemo mitungi ya gesi, wakisisitiza kuwa matumizi ya nishati safi ni mkakati muhimu wa kupunguza ukataji wa miti unaochangiwa na matumizi ya kuni na mkaa.
Wamesema kuwa nishati safi siyo tu inalinda mazingira, bali pia inaboresha afya za wananchi na kupunguza madhara ya kiafya yanayotokana na matumizi ya nishati zisizo rafiki kwa mazingira.
Kwa upande wao, baadhi ya wanachama wa Jumuiya ya Wazazi CCM wakiwemo wajumbe wa Kamati ya Utekelezaji, wamesema wataendelea kushirikiana kwa karibu na Serikali pamoja na uongozi wa chama ili kuhakikisha wananchi wanashiriki na kunufaika na fursa mbalimbali za maendeleo, hususan katika sekta za mazingira, afya na maendeleo ya jamii.
Shughuli hiyo imeakisi mshikamano wa wanachama wa CCM katika kuenzi misingi ya chama chao kwa vitendo, huku maadhimisho ya miaka 49 ya CCM yakitafsiriwa kama fursa ya kuchochea uzalendo wa vitendo, kulinda mazingira na kuendelea kujenga taifa lenye maendeleo endelevu na ustawi wa wananchi.
Mwenyekiti wa Jumuiya ya Wazazi CCM Wilaya ya Shinyanga Mjini, Mzee Fue Mrindoko, akizungumza kuhusu umuhimu wa utunzaji wa mazingira na kuunga mkono juhudi za serikali.
