ACHAGIZA AMANI NA MSHIKAMANO KATIKA FUTARI YA PAMOJA UKEREWE

 

Katika hafla ya futari ya pamoja iliyofanyika wilayani Ukerewe mkoani Mwanza, Mkuu wa Wilaya hiyo, Mheshimiwa Christopher Ngubiagai, ametoa wito mzito kwa waumini wa dini ya Kiislamu na Watanzania kwa ujumla kutumia mwezi mtukufu wa Ramadhani kama darasa la kuimarisha taqwa, amani, na mshikamano wa kitaifa. 

Akizungumza kwa unyenyekevu na mamlaka, DC Ngubiagai alibainisha kuwa funga si tu ibada ya kujizuia kula na kunywa, bali ni shule inayomfundisha mwanadamu kuwa na subira, upendo, na uadilifu katika jamii, mambo ambayo ndiyo nguzo kuu ya ustawi wa wilaya yake na Tanzania kwa ujumla.

Mkuu huyo wa Wilaya alisisitiza kuwa mshikamano wa Watanzania haupaswi kuyumbishwa na tofauti za kidini, kikabila, wala kisiasa, kwani nchi imejengwa juu ya msingi wa kuishi kama familia moja. Akirejea mafundisho ya Qur'an, alikumbusha kuwa waumini wote ni ndugu, hivyo ni wajibu wa kila mmoja kulinda amani ya nchi kwa nguvu zote kuanzia ngazi ya familia hadi kitaifa.

Aidha DC Ngubiagai aliongeza kuwa malezi ya watoto na ulinzi wa familia ndiyo msingi wa taifa bora, akihimiza wazazi kuhakikisha watoto wanapata elimu mbili muhimu; elimu ya dunia ili kuwapa maarifa ya kulijenga taifa, na elimu ya dini ili kuwajengea maadili mema na hofu ya Mwenyezi Mungu.

Vilevile, Mheshimiwa Ngubiagai alihimiza umuhimu wa kufanya kazi kwa juhudi na kutafuta kipato halali, akibainisha kuwa serikali inathamini bidii katika kazi kama njia ya kujijengea heshima na kuepuka dhuluma au rushwa. 

Alieleza kuwa jamii inayofanya kazi kwa juhudi ndiyo inayojenga uchumi imara na maendeleo ya kweli kwa ajili ya Ukerewe. Katika kipindi hiki cha toba, aliwaomba waumini kutoacha kuwaombea viongozi wa dini na viongozi wa serikali, hususan Rais wa Jamhuri ya Muungano wa Tanzania, Mheshimiwa Dkt. Samia Suluhu Hassan, ili Mwenyezi Mungu amjalie afya njema na hekima ya kuendelea kuliongoza taifa katika misingi ya haki, busara, na amani.

Akihitimisha neno lake la salamu kwa unyenyekevu, DC Ngubiagai alitoa dua maalum akiiombea wilaya ya Ukerewe na Tanzania kwa ujumla iendelee kubaki katika neema ya utulivu. 

Alisisitiza kuwa mafunzo ya mwezi wa Ramadhani yanapaswa kuwa dira ya maisha yetu hata baada ya mwezi huu kupita, ili kuendelea kuijenga Ukerewe yenye umoja na mshikamano wa dhati kuelekea maendeleo endelevu.

Kama una Taarifa, Habari, Tangazo n.k Wasiliana nasi kupitia shinyapress@gmail.com au +255 788 469 464